افلام الرعب المصرية

السلام عليكم ورحمة الله وبركاته

مع تقدم الولايات المتحدة تكنولوجيا ادى ذلك طبعا لتقدمها فى صناعة السينما
وخصوصا فى صناعة سينما الرعب
لتقدم افلام تشعرك بمتعة الرعب والخوف الذى قد لايعيشه الكثيرون فى حياتهم
ولكن ما الحال مقارنة بالرعب المصرى او بمعنى اصح افلام الرعب المصرية

اقولكم.....

افلام الرعب المصرية حاجة تانية رعب حقيقى مخيف وغامض مضاف اليه بعض الشطة والفلفل كما حال الافلام وقد تكون انتا احد ابطاله ولامفر من ان تكون

طب والرعب ده بيتمثل ف ايه؟؟!

طب صحصح بقى وفتح مخك معايا عشان تفهم انا عايزة اقولك ايه!!

البيروقراطيه والروتين

احد الافلام الغامضة اكثر منها مرعبة كما انها مرهقة فى نفس الوقت
يتعرض لها عامة الشعب يوميا
ولو حضرتك معاك فلوس تمشى بيها امورك
او معاك واسطة تسهلك وتخلصلك الامور
يبقى سيبك من الفيلم ده وخش ع اللى بعده

معرفة اخر الاخبار

افلام كئيبة تدعوك للاحباط والقرف ودى بتم عن طريق قراءة الجرايد او مشاهدة الاخبار على اى قناة
وبتبقى محبطة جدا لو هى اخبار عن حالة البلد او انتا وصاحبك قاعدين
مع بعض تتكلموا فى السياسة واحوال الناس وقعدتوا تتكلموا عن تعديلات الدستور
والتوريث والذى منه
واذا افترضنا ان حضرتك مش مهتم بالسياسة ومش بتحب تقرى او تتفرج ع الاخبار
وانسان متفائل مش كئيب سيبك من ده وتعالى ع اللى بعده

التعليم

من نوعية الافلام المبهمة غير المفهومة التى تعتمد على الحفظ
ومالهاش لزمة وتزداد رعبا جدا ايام الامتحانات وخصوصا امام ورقة الامتحان
او لما المراقب يقفشك وانتا بتغش او تغشش وكمان كل مابيقرب يوم النتيجة بيزداد الرعب والفزع بطريقة ترعبك شخصيا حتى لو انتا مش طالب
وهى برده افلام مالهاش لزمة تعيش فيها عمرك كله ع الفاضى وتبقى ولا كأنك عملت حاجة
ولو سعادتك بقى فى مدارس اجنبى او فى جامعة اجنبية
وكمان نبيه وبتفهمها وهى طايرة
سيبك من الفيلم ده ويلا ع اللى بعده

كليبات وافلام اليومين دول

افلام تحصر بصحيح
كليبات عرى مبتذلة
وافلام عبيطة وهبلة حاجة تقرف
طبعا هتقولى ماليش فى الكلام ده انا متدين
او بتحب تتفرج على افلام اجنبى
جيت فى جمل يعنى تعالى ع اللى بعده

زحمة وقرف المواصلات

احد اكثر الافلام خنقة ورعب وارهاق
تتمثل الخنقة فى انك تستنى مواصلة فيها مكان للوقوف حتى
ويتمثل الارهاق فى كتر الانتظار والوقفة خلال فترة الركوب
ويتمثل الرعب فى الشعبطة (عشان لو وقعت ولا حاجة)
ولو حضرتك ميسور ومعاك فلوس وتقدر تستحمل جشع سواقين التاكسى
او عندك عربية
يبقى سيبك من الفيلم ده وتعالى معايا ع اللى بعده

الزبالة والشحاتين

من نوعية الافلام المقززة ذات الرائحة الكريهة
وهى برده افلام غلسة جدا ومش بتسيبك غير لما تديها ربع جنيه او تشترى منها كيس مناديل ومناظرها اعوذ بالله
ولو سعادتك ساكن فى منطقة راقية او مش بتمشى فى الشارع كتير
سيبك من ده وتعالى ع اللى بعده

الفواتير والغلا

افلام مفزعة ومش بتتصدق اول ماتشوفها
وتتضمن فواتير الميه والكهرباوالتليفون
واى حاجة عايز تشتريها او ممكن تشتريها
هنقول انك مرتاح ماديا ومش فارق معاك
يبقى تعالى ع اللى بعده

حوادث الطرق والقطارات والعبارات

افلام فى منتهى الرعب والفزع
غالبا ماتنتهى بالوفاة او لو حظك كويس تبقى عاهة
وهى افلام تتكرر يوميا على الطرق ومع مختلف انواع المقطورات والسيارات
والميكروباصات والاتوبيسات
وموسميا مع القطارات ومع اى عبارة تسمى السلام
ولو سعادتك مش من الناس اللى بيركبوا عبارات او قطارات او بيمشوا فى طرق سريعة خطرة
يبقى سيبك من الفيلم المفزع ده و يلا ع اللى بعده

الجريمة

افلام الاثارة والغموض والرعب والفزع وكل حاجة نفسك فيها
تبقى ماشى ف امان الله فى الشارع بالليل وتلاقى بلطجية طلعوا عليك ادوك
علقة سخنة ونفضوك
وطبعا حوادث التحرش والاغتصاب اللى انتشرت بشكل مخيف
ووضع اليد والسرقة والنشل
ولو قلنا ان ربنا فى بيت سعادتك وبيسترها معاك يبقى معايا ع الفيلم اللى بعده

انتشار الامراض الخبيثة

وده فيلم مؤلم جدا ومرعب خصوصا لما يكون ابطاله اطفال
مع انتشار طبعا اهمال الاطباء والمستشفيات الحكومية
ولو قلنا ان صحتك بمب وانك معاك فلوس تتعالج بيها ف احسن مستشفى سيبك
من ده ويلا ع اللى بعده

الفقر والامية

ودى افلام غامضة ومرعبةهتشوفها كتير وهى سبب اغلب المصايب اقصد الافلام اللى فاتت
انتا طبعا غنى ومتعلم ومش فارق معاك حاجة يلا ع الفيلم الجاى

امن الدولة

اكثر الافلام المصرية رعبا على الاطلاق
وجرب تبقى معارض للنظام
او منضم للاخوان وهتشوف الرعب على اصله
جرب تبص لضابط بصة مش حلوة او تقول كلمه مش كويسه فى التليفون على ريسنا الهمام
وانتا هتلعن اليوم اللى اتولدت فيه
ده خصوصا بعد التعديلات الدستورية الاخيرة
طب انتا مسنود او مالكش فى الكلام ده
هقولك خلص الكلام

طب ماشى استنى ايه الحل؟؟!!

الحل هوة
اما انك تهاجر
او تسافر الخليج تجبلك قرشين
او تسرق
او تنضم للنظام(حزب وطنى.وزارة.مجلس شعب.شرطة. جيش .امن دولة.....)
او تمتلك عبارة اسمها السلام
او تفتحلك مشروع وانتا ونصيبك
او تنتحر وتخلص

طب انا مش عايز اعمل كده؟؟!!

هقولك يبقى مفيش قدامك غير تلت حلول وهتعملهم يعنى هتعملهم

1- انك تموت بالافلام اللى قولنا عليها دى
2- تموت بحسرتك
3-تموت من الرعب

شوفته بقى ازاى مصر سباقة فى صناعة افلام الرعب
يلا اهو حاجة متقدمين فيها

برافو برافو برافو
تسلم ايديك على التوبيك دا
مفيش بعد الكلام اللى قولتيه دا حاجه تتقالتسلم ايدك يا ويللا

شكرا سانتوس على مرورك

شكرا لك مع خالص تحياتي
بس كفاية حرام كفاية

مشكوووووووووووووووووور

شكرا يا جماعة جدا على المرور